Matje falas e tensionit në natyrë – Agjencia e Shëndetit në Familje ndërgjegjëson qytetarët për hipertensionin

Në kuadër të Ditës Botërore të Hipertensionit, infermierët e Agjencisë së Shëndetit në Familje u vendosën pranë Digës së Liqenit Artificial të Tiranës për të ofruar matje falas të tensionit arterial për qytetarët. Kjo nismë synonte të ndërgjegjësonte komunitetin për rëndësinë e kontrollit të rregullt të tensionit të gjakut, si një hap thelbësor për parandalimin e sëmundjeve kardiovaskulare.

Qytetarë të moshave të ndryshme ndaluan për të përfituar nga ky shërbim falas dhe për të marrë këshilla profesionale mbi mënyrën e menaxhimit të hipertensionit përmes stilit të jetesës së shëndetshme dhe ndjekjes së trajtimit mjekësor kur është e nevojshme.

“Hipertensioni shpesh quhet ‘vrasësi i heshtur’ sepse nuk jep simptoma, por ka pasoja të rënda nëse nuk kontrollohet,” u shpreh një prej infermierëve të përfshirë në aktivitet. “Matja periodike është një akt i thjeshtë, por shumë i rëndësishëm për shëndetin.”

Agjencia e Shëndetit në Familje mbetet e angazhuar për t’u afruar edhe më shumë komunitetit, duke promovuar kujdesin parandalues dhe shërbimet e kujdesit shëndetësor në mënyrë të personalizuar dhe të afërt me qytetarin.